يمكن كان ليا محاولة مع السودكو قبل كدا من فترة طويلة لكن كانت بدون حماس وانتهت الى وصفها بأنها لعبة سخيفة SU-DO-KU
لكن اللى حصل من كام يوم .. معرفش بدأ ازاى الصراحة .. انى بقيت بلعبها بكثرة ودخلت مرحلة الأدمان بسرعة , فى أول يومين بس حليت حوالى 15 واحدة , حاليا تخطيت الخمسين
و تفهمت سبب الهوس العالمى باللعبة الممتعة بالفعل
وحاولت أحلل استمتاعى انا الشخصى بيها ليه بقى .. لقيت انها بتحتاج نوع من التركيز المتفرغ .. يعنى مينفعش تكون بتفكر ايه الرقم
اللى ممكن يتحط فى الخانة ودماغك سرحانة فى حاجة تانية
وأنا بقالى فترة بعانى من كثافة التفكير المتوازى , ودا شىء مش جديد لكن الجديد والمتعب كان انه بزيادة منهكة
ان دماغك تبقى شغالة فى كذا جهة فى وقت واحد ... زحمة من الأفكار والأحداث ... شبووورة
نومى الخفيف المعتاد بدأت اتزمر منه .. لأنه زاد عليه انى بنام وعقلى بيفضل صاحى وشغال كأنه فى محاضرة مثلا ...حاجة زى ايام الامتحانات كدا ... فتقوم من النوم مرهق ومحتاج راحة
:D
فزائد ان السودوكو ممتعة .. أديتى مساحة من الأسترخاء والريست لما بتوحد تفكيرى معاها هى بس , كل مساحات تفكيرى المتوازية والعمودية والمربعة كمان بتبقى مع صفوف وعواميد ومربعات السوكودو
:D
أنا حبيت أسجل بس بدايتى مع السودكو .. لما أشوف هزهق منها امتى
و أعتقد انى هستمر فيها فترة أطول من اللى لعبت فيها الشطرنج - اللى نسيته دلوقت للأسف- لأنها بتتميز عنه انها مش محتاجة حد يلعب معاك زى مشكلة الألعاب الثنائية اللى ممكن متلاقيش حد يشاركك فيها فتتوقف
دكتور أشرف حمدى فى مدونة كاريكاطظ برضه أتكلم عن اللعب
وهكرر سؤاله .. يا ترى انت بقى بتلعب ايه دلوقت ؟
16 comments:
تعرفى ان دة تقريبا نفس السبب اللى خلانى ادمن السودوكو...لدرجة اننا كنا انا و اختى و بنت عمى و بنت خالتى كل يوم نتلم على السرة و نعمل فيها مسابقة و نحلها بالاستوبوتش ونشوف مين خلص اسرع و بلا اخطاء لكن بعد فترة كلنا اتناولنا و الوحيدة اللى بقيت على السودوكو هىاختى لدرجة انى جبتلها هدية كتابين سودوكو و واحد كاكورو هدية من كتر ادمانها..الكاكورو دى السودوكو جنبها لعبة اطفال ...بجد صعبة طحنو محتاجة تركيز يالحييييييييييل
أخر حاجة كنت بلعبها كانت استميشن..بس ما بقاليش تقل عليها برضو..عموماً الاستميشن في رأيي بتبيّن أسلوب حياة اللّي بيلعبها.
السودوكو لعبتها فترة على موبايل واحد صاحبي بس ما هويتهاش يعني.
أخر حاجة كنت بلعبها كانت استميشن..بس ما بقاليش تقل عليها برضو..عموماً الاستميشن في رأيي بتبيّن أسلوب حياة اللّي بيلعبها.
السودوكو لعبتها فترة على موبايل واحد صاحبي بس ما هويتهاش يعني.
بلعب استيماشن وترنيب اجمل حاجه فيهم بيعلمو روح الكره بينك وبين اصحابك جست هيومن اكيد فاهم انا قصدي ايه عشان قمة المتعه انك تخلي صاحبك يلم بخمسه تريفل ويجيله شلل اطفال
عمري مالعبت السودوكو
أنا برضه على فكرة بقيت من هواة السودوكو .. فى الأول كنت فاكراها صعبة بس بعد كده لقيتها سهلة بس محتاجة تركيز .. و لقيتها فى كل حتة
(الدستور،الأهرام، على النت موبايل صاحبتى .. ده حتى لما رحت مكتبة ديوان لقيت قسم خاص للسودوكو :))
حاليا أنا بالعب سودوكو و معاها لعبة على الفيس بوك اسمها
biggest brain
sou
انا بلعب السودوكو فى الجرايد وعلى النت .. فى سايت لذيذ http://www.websudoku.com/?level=1
معرفش الكاكورو دى الصراحة .. هعمل عليها سيرش أو لو عندك موقع ليها تدلينى عليه بقى
نورتينى :)
عمرو
أفتكرت كلامك عن الاستميشن وانا بكتب البوست دا .. أغلب ألعاب الكوتشينة فيها مساحات للسرحان وخاصة لو على وزن فكرة فيلمك هتبقى عذاب .. عكس اللى بنشده من السودوكو أصلا :)
وائل
اجمل حاجة انهم بيعملوا روح كره ؟ بقى دى تبقى أجمل حاجة حرام عليك :D
انا كنت غاوية الاستيمشن فترة برضه بس الفريق اللى كنا بنلعب سوا أنشغلنا وبعدنا
سايكو
انا دلوقت بقيت بقصها من الاهرام والدستور وأشيلها معايا فى الشنطة عشان ألعبها فى الشغل :D
شفتى شغلى مسلى ازاى يا أيات :s
وع النت طبعا .. بس نفسى انزلها ع الموبايل بس مش عارفة هتنفع على بتاعى ولا لأ
عايزة أجرب ال biggest brain
دى مرة برضه سامعة ناس كتير عايشة فيها برضه
جربتها من فترة كده
واتخنقت منها بصراحة..حسيتها محتاجة تركيز زيادة..وده مش موجود عندى اليومين دول..غير ان انا باكره الارقام!!
بالعب البازل اللى ع الفيس بوك..بحبه اوى
ومافيا..ع الفيس بوك برضو من وقت للتانى
:))
أنا مش بلعب يا ولااااء، إيه الفراااغ ده ؟؟؟؟ ، على فكرة أنا فاضي برضووو ، بس فيه حاجات كثيييير الواحد يعملها غير إنه يلعب !!!، لسـه شوية :)ى
.
.
تحيااااتي
أنا بعد ادمان سودوكو اللي وصل لدرجة غير محتملة دخلت دلوقتي في ساموراي سودوكو
ودي طبعا للمحترفين اللي زي حالتنا بس
جربيها قوقلي رأيك
http://www.sudoku.4thewww.com/samurai.php
ممكن نحجزلك في حملة استاذ عمرو خالد للعلاج من السودوكو
علمونا ونحن صغار في مكان ما الا يكون لك عادة تتمكن منك ويصعب عنك تركها بعد ذلك
ادعوكي لزيارة مدونتي لحن الغروب
ابراهيم
حقيقة في التوقيت الدراسي دة
دلوقتي
انا بيتلعب بيا
حج مقبول وسعي مقبول عقبالنا يا رب:)
Post a Comment