أولا .. أعتقد طبقا لمواد الدستور الجديد .. يجب أعتقال محمد محى عشان أغنيته الجديدة دى
بتهمة زعزعة الأمن العام والتحريض على الأحباط
يعنى ناس زيى على أبواب التخرج بعد خمس سنين من الطحن والتفعيص والامتحانات والسكاشن والتفاعلات الكيميائية والفيزيائية و القهرية و على وشك الاحتكاك المؤسف مع سوق العمل المصرى مينفعش يسمعوا
أتخنقت وطلعت كنت بضيع وقت
كان حلم وهمى وانا صدقت للأسف صدقت
أحبطت واتخبطت
أنا موصلتش لحاجة من اللى حلمت بيه
سوء أختيار دا ولا سذاجة ولا أيه
و عينى عليكى يا طيبة
بذمة الحقوق الدستورية دا كلام يتقال؟ لأ ويتغنى كمان
وختامها بقى ..
رجعت للصفر
من مكان ما بدأت
حسيسنى انى راجعة مكتب التنسيق تانى
هو فعلا أمبارح كنا رايحين نقدم السى فيهات بتاعتنا فى مؤتمر التوظيف الصيدلى العظيم ..
بس أيام مكتب التنسيق دخلت الكلية اللى كتبتها رغبة أولى
لكن امبارح كنا بنقدم فى كل أنواع الشغل المتاحة .. حتى اللى مش بنحبه
حد لاقى على رأى صاحبتى :d
بس انا برضه مش هشتغل على مزاج حد
شغل ايه يا بنتى انت صدقتى ..لسة شهرين ع التخرج
ركزى ربنا يهديكى عشان الترم دا انت فى منتهى اللامذاكرة ومش عارفين هترسى على أيه
4 comments:
الله يكرمك ركزى
وخدى الدنيا خطوه خطوه
نتخرج الاول وبعدين نفكر فى الشغل
وبعدين ياسيتى ان شاء الله هتشتغلى الحاجه اللى بتحبيها
لا عادي انا فاضلي سنتين بس واتخرج والحمدلله المستقبل مظلم جدا بس ايه العمل
بالمناسبه انا في طب
وبعدين ما الدستور بيكفلك كل حقوقك
مش عارف الناس الوحشيين مش عاجبهم الدستور ليه ماهو زي الفل
مش كفايه انه الحمد لله اخيرا ادى كل الامتيازات للشرطه عشان يعرفو يحمونا من نفسنا
مدونة جميلة يا ولاء، وتدوينات مختصرة وخفيفة
بالنسبة للبوست ده كله جاي إن شاء الله
محمد البنا
وائل
عمرو زقزوق
منورين البلوح والله
أنا خلاص توقفت عن التفكير فى الموضوع دا .. دى كانت رفاهية ووفرة وقت ..حاليا الأمتحانات مش مديانا فرصة نتورب
Post a Comment