Friday, April 27, 2007

أغيب أغيب و اسأل عليك

Photo Sharing and Video Hosting at Photobucket
تحديدا هذه الأيام التى لا يُكتب فيها سطرا
تمتلىء ساعتها بأشياء تطالب بحقها فى أن يُدون عنها
و أستمر فى كسر وعدى
سأكتب فى المساء
البلوج نفسه بدأ فى تكوين أنطباعات غير طيبة عنى
حقك عليا يا عزيزى
أنا زعلتلك والله :)
قريبا هنطلع الحاجات اللى فى الأرشيف
وحتى يحين هذا القريبا
هنقول الموجز
العميد أصدر فرمانا الى طلابه أبناءه مضمونه (أخرسوا مش عايز صداع)-
عملنا حفلة للدفعة :D-
..ومن ساعتها وأنا مش عارفة أرجع موود المذاكرة اللى بجد تانى
-هافة عليا موجة حنين لناس كتير موجودين وغايبين .. ودا غريب نوعا لأنى عادة أحن الى الأشياء والأماكن أكثر من الأشخاص
أهم حاجة بقى
أنسكب كوب النسكافيه بكامله ع الكيبورد والماوس النهاردة
دا غير أن من يومين صاحبتى قالتلى انها شافتلى رؤية جميلة ومش راضية تقولهالى
خير خييييير
بيقولوا خير
نتيجة الترم الأول لسة مطلعتش
غالبا لسة مستوتش... أو النار زادت عليها شوية وأتحرقت منهم وخايفين يقولولنا

Thursday, April 5, 2007

يا عينى ع العمر

أولا .. أعتقد طبقا لمواد الدستور الجديد .. يجب أعتقال محمد محى عشان أغنيته الجديدة دى
بتهمة زعزعة الأمن العام والتحريض على الأحباط
يعنى ناس زيى على أبواب التخرج بعد خمس سنين من الطحن والتفعيص والامتحانات والسكاشن والتفاعلات الكيميائية والفيزيائية و القهرية و على وشك الاحتكاك المؤسف مع سوق العمل المصرى مينفعش يسمعوا
أتخنقت وطلعت كنت بضيع وقت
كان حلم وهمى وانا صدقت للأسف صدقت
أحبطت واتخبطت
أنا موصلتش لحاجة من اللى حلمت بيه
سوء أختيار دا ولا سذاجة ولا أيه
و عينى عليكى يا طيبة
بذمة الحقوق الدستورية دا كلام يتقال؟ لأ ويتغنى كمان
وختامها بقى ..
رجعت للصفر
من مكان ما بدأت
حسيسنى انى راجعة مكتب التنسيق تانى
هو فعلا أمبارح كنا رايحين نقدم السى فيهات بتاعتنا فى مؤتمر التوظيف الصيدلى العظيم ..
بس أيام مكتب التنسيق دخلت الكلية اللى كتبتها رغبة أولى
لكن امبارح كنا بنقدم فى كل أنواع الشغل المتاحة .. حتى اللى مش بنحبه
حد لاقى على رأى صاحبتى :d
بس انا برضه مش هشتغل على مزاج حد
شغل ايه يا بنتى انت صدقتى ..لسة شهرين ع التخرج
ركزى ربنا يهديكى عشان الترم دا انت فى منتهى اللامذاكرة ومش عارفين هترسى على أيه